2020-ci ildə Azərbaycan təhsil sistemində
informasiya-kommunikasiya üzrə maddi-texniki baza təkmilləşdirilmiş, kompüter
avadanlığı və digər zəruri rəqəmsal avadanlıqla təminat işi davam etdirilib.
Təhsil müəssisələrinin İKT avadanlıqları ilə təmin olunması məqsədi ilə ölkə
üzrə 9000 ədəd noutbuk, 262 ədəd robot dəsti, 400 ədəd proyektor təhsil
müəssisələrinə çatdırılıb, quraşdırılıb və aktivləşdirilib. Bununla yanaşı, 79
təhsil müəssisəsində videomüşahidə sistemi genişləndirilib, 328 təhsil
müəssisəsi isə internet sürətinin artırılması məqsədi ilə avadanlıqlarla təmin
edilib.
Təhsil Nazirliyi tərəfindən Azərbaycanın ən böyük
daxili təhsil şəbəkəsi olan Azərbaycan Təhsil Şəbəkəsini (ATŞ) genişləndirilib.
Beləki, hazırda ümumi olaraq ölkə üzrə 4140 təhsil müəssisəsinin təhsil
sisteminin korporativ İntranet və İnternet şəbəkələrinə çıxışı təmin edilib.
Bunlardan 343 fiber-optik, 1836 ADSL və 1961 simsiz rabitə kanalı vasitəsi ilə
ATŞ-ə qoşulub. Həmçinin, cari ildə 225 təhsil müəssisəsində yeni lokal
şəbəkələr yaradılıb, 140 təhsil müəssisəsində lokal şəbəkələr genişləndirilib, 30
təhsil müəssisəsi fiber-optik qoşulma növünə keçirilib, 250 nəfər xüsusi
qayğıya ehtiyacı olan uşaqların distant təhsilinin təşkil olunması məqsədi ilə
ayrılmış kompüterlərin ATŞ-yə və internet şəbəkələrinə çıxışı təmin edilib.
Xatırladaq ki, ATŞ-yə qoşulmuş təhsil
müəssisələri intensiv trafik tələb edən proqramlardan, videokonfranslardan və
Təhsil Nazirliyinin Məlumat və Resurs Mərkəzində yerləşdirilmiş elektron tədris
resurslarından sürətli və təhlükəsiz formada istifadə etmək imkanına malikdir. ATŞ-yə
qoşulmuş təhsil müəssisələrində internet süzgəcləmə sistemi tətbiq olunur ki, bu
texnologiya internet-axtarış sistemlərində müxtəlif dillərdə 60-a qədər
kateqoriya üzrə zərərli informasiyanın axtarışını məhdudlaşdırır və uşaqların
zərərli məzmundan maksimal müdafiəsini təmin etməyə imkan verir.