Müsabiqə və olimpiadaların idarəolunmasında tətbiq edilən yeni mexanizmlər

  • Çərşənbə , 2 İyun 2021


  • 13:25

Müasir dövrdə ölkələrin inkişafı müxtəlif sahələr üzrə rəqəmsallaşma, yeni texnologiyaların aktiv tətbiqi və insan iştirakı olmadan ən yeni sahələrin sürətli inkişafı ilə səciyyələnir. Dünyada artan bu rəqabətə davam gətirə bilmək üçün isə iqtisadiyyatın inkişafı müasir və güclü təhsilə arxalanmalıdır. Bu baxımdan, son illər ölkədə təhsilin rəqəmsal transformasiyası üzrə sistemli və ardıcıl  islahatlar həyata keçirilir.

Təhsilin modernləşdirilməsi üzrə görülən tədbirlərin tərkib hissəsi kimi, əsas istiqamətlərdən biri təhsilin rəqəmsal idarəedilməsidir. Bununla əlaqədar, cari ildə Təhsil Nazirliyinin təqdim etdiyi bütün elektron xidmətləri vahid məkanda birləşdirən https://portal.edu.az/ platforması istifadəyə verilmişdir. Vətəndaşlar platformada qeydiyyatdan keçməklə, öz şəxsi kabinetləri vasitəsi ilə rahatlıqla müvafiq elektron xidmətlərdən faydalana bilirlər. Bu xidmətlər sırasında hazırda “Müsabiqə və Olimpiadalar” bölməsi vasitəsi ilə Respublika Fənn Olimpiadalarının təşkili həyata keçirilir. Olimpiadaların idarəolunmasında tətbiq olunan bu mexanizm proseslərin çevik və keyfiyyətli təşkilinə şərait yaradır.

A. Ərizələrin elektron qəbulu. Şagirdlər heç yerə getmədən öz şəxsi kabinetləri vasitəsi keçirilən müsabiqə və olimpiadalar barədə məlumat əldə edir və iştirak üçün rahat şəkildə müraciət edə bilirlər. Müraciət göndərildikdən sonra sistemdə şagirdlərə imtahan tarixi, məkanı və digər detallar qeyd olunmuş buraxılış vərəqələri təqdim edilir.

B. Məlumatların izlənilməsi. Şagirdlər, həmçinin, şəxsi kabinetlərində öz nəticələri, müsabiqə və olimpiadaların hazırda hansı mərhələdə olduğu və digər yeniliklər barədə məlumatları izləyə bilirlər. Bu isə, proseslərin mövcud statusu barədə çevik məlumat əldə edilməsini və istənilən məkandan yoxlanılmasını əlçatan edir. 

C. İştirakçıların mükafatlandırılması. Olimpiada və müsabiqədə uğurla iştirak etmiş şagirdlərə sistemdə elektron nailiyyət sənədləri (sertifikatlar) təqdim edilir. Şagirdin iştirak etdiyi bütün müsabiqələr, naililiyyətləri və sertifikatları sistemdə saxlanılır və şəxsi kabinetdə öz əksini tapır.

D. Proseslərin avtomatlaşdırılması. Olimpiada və müsabiqələrin idarəolunmasının rəqəmsallaşdırılması sistemdə imtahan mərkəzlərinin təyin edilməsinə, müraciət edən şagirdlərin avtomatik olaraq imtahan mərkəzləri üzrə yerləşdirilməsinə, şagirdlərin ümumi siyahısına nəzarət etməyə, müvafiq hesabatların hazırlanmasına imkan verir. 

E. Nəticələrin təhlili. Sistemdə monitorinq imkanı vardır ki, bu da öz növbəsində, illər üzrə keçirilən müsabiqə və olimpiada nəticələrinin təhlil olunmasına və şagird nailiyyətlərinə əsasən effektiv tədris strategiyalarının hazırlanmasına şərait yaradır.

Göründüyü kimi, müsabiqə və olimpiadaların idarəolunmasında innovativ yanaşmaların tətbiqi bu proseslərin daha keyfiyyətli, dəqiq, sürətli və şəffaf təşkilini, həmçinin, nəzarət və hesabatlılığı təmin etmiş olur.