Emilya Səfərəliyeva 2016-ci ildən etibarən Bakı şəhəri
36 nömrəli orta məktəbdə direktor vəzifəsində işləyir. Emilya xanımın sözlərinə
görə, məktəbə təyin edildikdən sonra uğurlu məktəb modeli istiqamətində araşdırmalar
aparır və səmərəli təlim-tərbiyə prosesinin qurulmasına çalışır.
“Məktəbə
direktor təyin edildikdən sonra ilk növbədə məktəb nəticələrinin və
imkanlarının təhlilinə başladım. Müəyyən edildi ki, məktəbin pedoqoji kadrları
yüksək akademik biliklərə malik olsalar da, müasir təlim metodikalarının öyrənilməsinə
və onların tətbiqi ilə bağlı təcrübə mübadiləsinə zərurət var. Çünki ənənəvi
metodlarla keçirilən dərslər ilə şagirdlərin diqqətini mövzuya cəlb etmək getdikcə
çətinləşir.”
“eTwinning Plus” layihəsi ilə ilk dəfə 2015-ci ildə
sosial şəbəkə vasitəsi ilə tanış olan direktor bildirir ki, layihə o zamandan
diqqətini cəlb edib. - “Layihədə iştirak
edən müəllimlərlə ünsiyyət qurur və Azərbaycanın şəhər və bölgələrindən olan
bir çox müəllimlərin layihə çərçivəsində əldə etdikləri uğurları ilə tanış
olurdum. Müəllimlərin inkişafı və əldə etdikləri uğurları məni bir təhsil
işçisi kimi çox qürurlandırırdı.”
2016-ci ildən layihənin aktiv üzvü olan Emilya
xanım, “eTwinning Plus” layihəsinin məktəbdə yaratdığı imkanlar barədə danışıb.
- “Bu gün rəhbərlik etdiyim məktəb kifayət
qədər müasir texniki avadanlıqlarla və sürətli internet xətti ilə təmin edilib.
Təhsilin yüksək zirvələrini fəth etmək üçün təşəbbüskar müəllimlərə ehtiyac var.
Bu baxımdan, “eTwinning Plus” layihəsinin rolunu xüsusi qeyd etmək istəyirəm. Layihənin
detalları ilə tanış olduqdan sonra bir qrup müəllimlərlə “eTwinning Plus” layihəsinin
böyük imkanlarını müzakirə etmək üçün dəyirmi masa keçirdik və qərara aldıq ki,
layihə bizim məktəbdə də həyata keçirilsin. Çox sevindirici haldır ki, bu gün məktəbimizin
20 müxtəlif fənn müəllimləri layihədə iştirak edir. Ümumi olaraq məktəbimiz “eTwinning Plus” şəbəkəsində 41
layihənin iştirakçısıdır. Önəmlisi odur ki, bütün layihələr şagirdlərin çoxşaxəli
inkişafına istiqamətlənib. Yaradılmış beynəlxalq əlaqələr məktəblilərin müxtəlif
mədəniyyətlərə inteqrassiyası ilə yanaşı, xarici dillərin öyrənilməsinə də böyük təkan verir. Bu da öz növbəsində, gələcəkdə
şagirdlərin multikultural və daha tolerantlı olmağına zəmin yaradır. Layihə çərçivəsində
əldə edilmiş nailiyyətlər bütün məktəbə öz müsbət təsirini göstərir. Tədris artıq
darıxdırıcı 45 dəqiqədən ibarət deyil, o daha əyləncəli, daha maraqlı, daha
keyfiyyətli bir prosesə çevrilib.
Direktor qeyd edib ki, bu layihə vasitəsi ilə dünya
məktəbləri ilə əlaqələrin genişləndirilməsiylə yanaşı, məktəbin respublika üzrə
reytinq cədvəlində də müsbət dinamikaya nail olmaq olar. – “Gizli deyil ki,
reytinq cədvəlində məktəb nə qədər yüksəkdə qərarlaşsa, bir o qədər yüksək
potensiallı və keyfiyyətli təhsilə maraqlı şagirdlər cəlb etmək olur və həmin məktəbin
müəllim nüfuzu daha yüksək olur. Bu baxımdan,
“eTwinning Plus” layihəsi məktəbimizin nümunəvi məktəb kimi tanınmasında
da öz müsbət təsirini göstərib. Ümid edirəm ki, gələcəkdə məktəbimiz “eTwinning
Plus” layihəsi çərçivəsində daha böyük işlərə və uğurlara imza atacaqdır.