28 iyun tarixində Təhsil Nazirliyində “İT Sənayesinin Tendensiyaları: Təhsilə Təsir” mövzusunda müzakirə keçirilib.
Tədbirdə Təhsil Nazirliyinin rəsmiləri, Azərbaycan Dövlət Pedaqoji
Universitet və universitet nəzdində Pedaqoji Kollecin nümayəndələri və məktəb
direktorları iştirak ediblər.
Tədbiri açan Təhsil nazirinin müavini Məhəbbət Vəliyeva müasir təhsil
sistemində informasiya-kommunikasiya texnologiyalarının tətbiqinin vacibliyi və
bu texnologiyalardan istifadənin dünya standartları səviyyəsinə çatdırılmasının
əhəmiyyətindən danışıb. Bildirilib ki, tədbirin keçirilməsində məqsəd ölkəmizdə
qurulan müasir təhsil sistemini qabaqcıl beynəlxalq təcrübədəki təhsil
örnəkləri ilə müqayisəli şəkildə təhlil etmək və təhsilin modernləşdirilməsində
vacib rol oynayan tərəflər ilə fikir mübadiləsi aparmaqdır.
Təhsil Sisteminin İnformasiyalaşdırılması İdarəsinin rəisi Vüsal
Xanlarov təqdimatla çıxış edərək, informasiya və kommunikasiya texnologiyaları
sənayesində baş verən və proqnozlaşdırılan 10 əsas texnoloji tendensiyalar barədə
ətraflı məlumat verib. Təhlil xarakterli təqdimatda texnoloji yeniliklərin
yaratdığı imkanlar və çağırışlar, eyni zamanda bu istiqamətdə tövsiyyə olunan
strategiyalar iştirakçılara çatdırılmışdır. Qeyd edildi ki, proqnozlara əsasən
2022-2024-cü illərə qədər rəqəmsal iqtisadiyyata keçid, süni intellektin
tətbiqi, böyük verilənlərin təhlili, əşyaların interneti və üçüncü platforma
texnologiyalarına sərmayələr, blokçeyn texnologiyasının tətbiqinin genişlənməsi,
bulud texnologiyalarının inkişafı və yeni nəsil proqramçılara ehtiyacın artması
fonunda təhsilin məzmunu, təchizatı və idarəolunması transformasiyaya
uğramalıdır.
Digər sahələrdə olduğu kimi təhsildə də bu inkişafın qaçılmaz
olduğunu qeyd edən Vüsal Xanlarov hazırda ölkəmizdə bu sahədə aparılan işlər barədə
danışıb. O qeyd edib ki, yeni texnoloji reallıqda təhsil sisteminin
modernləşdirilməsi üçün şagirdlərin tədrisi fərdiləşməyə uyğun
istiqamətləndirilməli və təhsilverənlərin inkişafı mütəmadi olmalıdır.
Sonda mövzu ətrafında fikir mübadiləsi aparılıb, müxtəlif təhsil
pillələri və ixtisasartırmada müasir texnologiyaların hazırkı vəziyyəti və
perspektivlər müzakirə edilib.