Bu gün informasiya və rabitə texnologiyalarının istifadəsi sahəsində
aparıcı istiqamətlərdən biri təlim fəaliyyətində müasir texnologiyalardan
effektiv istifadənin təmin edilməsidir. Bu fəaliyyətin həyata keçirilməsi
məqsədi ilə Təhsil Nazirliyi tərəfindən Azərbaycan dilli elektron məzmunun
yaradılması və tədrisdə innovativ mexanizmlərin tətbiqi istiqamətində
geniş işlər həyata keçirilməkdədir.
Cari ildə pandemiya dövründə təhsilin əlçatanlığını təmin etmək məqsədi ilə
Təhsil Nazirliyi şagird və müəllimlərin rahatlıqla qeydiyyatdan keçərək elmi
biliklər, qiymətləndirmə və onlayn dərslərə çıxışını təmin edən və "Microsoft
Teams" bazası üzərində qurulmuş "Virtual
məktəb" platformasını
istifadəyə verib. Bu platformada bütün elektron kitablar, video dərslər, əlavə
təhsil proqramları və mərkəzləşdirilmiş test nümunələrini tapmaq mümkündür.
Bütün bu resurslar üz-üzə görüşləri təmin etmək, tapşırıq və müzakirələri
bir-birinə inteqrasiya etmək üçün vahid bir mərkəzdə cəmləşdirilib.
Təhsil Nazirliyi tərəfindən www.e-resurs.edu.az, www.e-derslik.edu.az,
www.video.edu.az portallarında mütəmadi olaraq yeni tədris resursları
yerləşdirilir və portalların fasiləsiz işləməsini təmin etmək, eyni zamanda
lazımi dəstəkləri göstərmək məqsədi ilə texniki dəstək göstərilir. Qeyd edək
ki, hazırda www.video.edu.az portalında video dərslərin sayı artırılaraq 3288 ədədə
çatdırılıb. Bura ümumi və peşə təhsili üzrə teledərslər, peşəkar müəllimlərin
video dərs izahları, 3D animasiyalı videolar, STEAM üzrə video dərslər, “Khan
Academy” dərsləri və qiymətləndirmə sistemli video dərslər daxildir. Cari ildə 760
ədəd yeni “Khan Academy” video dərsləri milli kurikuluma uyğunlaşdırılıb və
portala əlavə olunub.
Cari ildə "İnformatika" fənninin yeni formatda tədrisi üzrə “Rəqəmsal bacarıqlar” layihəsinin də tətbiqi uğurla davam etdirilib. Layihə
cari tədris ilində həm coğrafi, həm də müəllim və şagird sayı baxımından
genişləndirilib. Belə ki, hazırda layihə Bakı, Sumqayıt, Gəncə, Mingəçevir,
Biləsuvar, Şamaxı, Lənkəran, Şirvan,
Şəki şəhər və rayonları üzrə 222 məktəbi və 100 mindən çox şagirdi əhatə
edir. Qeyd edək ki, şagirdlərdə alqoritmik düşüncə, məntiqi təfəkkür, layihə
qurmaq bacarıqlarının inkişafı və proqramlaşdırmanın əsaslarının öyrətmək
məqsədilə həyata keçirilən layihəyə 2017-2018-ci tədris ilində start verilib.
İlkin mərhələdə layihə Bakı şəhəri üzrə 43 məktəb və 6500 şagirdi əhatə edib.
“Erasmus+” proqramı çərçivəsində həyata keçirilən “eTwinning Plus” layihəsində Azərbaycanı ümumilikdə 524 məktəbin 1912
müəllimi 1751 təhsil layihəsi ilə təmsil edib.
Cari ildə ölkədə pandemiya ilə əlaqədar mövcud karantin dövründə
müəllimlər üçün təşkil olunan 31 onlayn təlimdə 741 müəllim, 6 üzbəüz təlimdə isə
107 müəllim iştirak edib. Bununla yanaşı, Avropalı mütəxəssisləri tərəfindən
onlayn formada təşkil olunan 8875 təlimlərə Azərbaycandan 267 müəllim qoşulub. Cari ildə layihə üzrə təşkil olunmuş beynəlxalq müsabiqədə ölkə üzrə ümumilikdə
628 layihə təqdim olunub. Nəticələrin noyabr ayında açıqlanması gözlənilir.