Təhsil Nazirliyinin dəstəyi, Təhsildə İnnovativ Texnologiyalar Əlavə
Təhsil Mərkəzi və “Mars Academy” şirkətinin təşkilatçılığı ilə Azərbaycanda
beynəlxalq “Polyup” layihəsi həyata keçirilir. Hesablama düşüncəsini inkişaf
etdirən, real həyatda problemlərin səmərəli üsullarla həllinə yönəlmiş və hər kəsə
açıq olan oyun tipli “Polyup” platforması vasitəsi ilə hər ay “PolyChallenge” və
digər xüsusi müsabiqələr keçirilir. “Youcubed Prize” bu cür xüsusi
müsabiqələrdən biridir. Müsabiqənin qalibi olmuş və Stanford Universitetinin
onlayn seminarında iştirak hüququ qazanmış Şahanə Bədəlova “Polyup” barədə
fikirlərini paylaşıb.
“Polyup” layihəsi barədə məlumatı ilk
dəfə hardan əldə etmisiniz?
“Polyup” barədə məlumata ilk dəfə sosial
mediada rast gəldim. Layihə marağıma
səbəb oldu və riyaziyyat fənnini şagirdlərə daha yaradıcı və əyləncəli formada
tədris etmək üçün gözəl imkan olduğunu düşündüm. Şagirdlərimi hər
kəsə açıq olan bu oyun tipli təhsil platforması ilə tanış etdikdən sonra
dərslərimizə maraq daha da artdı və hazırda riyaziyyat dərslərində bütün
şagirdlərimiz həvəslə iştirak edirlər.
“Youcubed Prize” müsabiqəsinə necə qoşuldunuz?
Qeyd edim ki, təhsil ilə bağlı
müsabiqələrə qoşulmağa həmişə maraqlı olmuşam. Özümlə yanaşı, şagirdlərə aid müsabiqələrə,
öz şagirdlərimi də cəlb etməyə çalışıram. Bu
müsabiqənin şərtləri ilə tanış olduqdan sonra, iştirak etmək qərarına gəldim. Yarışa
qoşulmaq üçün müəllim və şagirdlərdən ibarət komanda yaratdıq. Yarış müddətində
şagirdlər tapşırıqlar yaradır və digərləri ilə paylaşırdılar. “Poly” maşınlar
adlanan bu tapşırıqları həll etdikcə, şagirdlər virtual “Poly” qəpikləri
qazanır və bu da müəllimlərin avtomatik olaraq əlavə virtual “Poly” qəpikləri
qazanmasına səbəb olurdu.
Onu da qeyd edim ki, digər
müsabiqələrdən fərqli olaraq, bu yarışın mövzusu daha konkretdir. Belə ki, sırf
riyazi bacarıqları inkişaf etdirmək şansı çoxdur. Həmçinin, məntiqi təfəkkürün
inkişafı və proqramlaşdırma bacarıqlarının ilkin bünövrəsini qoyur. Tapşırıqların
həlli üçün şagirdlər öncədən hansı əməllərin hansı ardıcıllıqda həll olunacağı
haqqında proqram tərtib edirlər ki, bu da onlara problemlərə sistemli və
əhatəli şəkildə yanaşmağı öyrədir.
Qeyd etməliyəm ki, bu müsabiqədə iştirak etmək mənə dünya şöhrətli
universitetin onlayn kursunda iştirak hüquqi ilə yanaşı, geniş dünya görüşü,
riyaziyyatla bağlı fərqli ideyalar və təcrübə qazandırdı.
Layihəni dərslərinizdə necə tətbiq
edirsiniz?
Mənim ixtisasım riyaziyyat-informatika
olduğu üçün “Polyup” mənim üçün əvəzedilməz vasitə oldu. Dərslərimdə
platformadan siniflər üzrə çətinlik səviyyəsinə uyğun olaraq istifadə edirəm.
Aşağı siniflərdə sadə tapşırıqlardan başlayırıq və mərhələ-mərhələ mürəkkəbliyi
artırırıq.
Bu platformadan istifadə dərslərimizi daha əyləncəli etməklə yanaşı, verilən hesab tapşırıqları şagirdlərdə gündəlik həyatda qarşılaşdıqları problemləri həll etmək, məlumatları məntiqi olaraq sistemləşdirmək, təhlil aparmaq, məsələnin həlli üçün səmərəli həll yolunu seçmək və məsələnin həllini avtomatlaşdırmaq kimi bacarıqlar formalaşdırır.
Layihə ilə bağlı həmkarlarınıza nə
məsləhət görərdiniz?
Həmkarlarıma www.polyup.com saytına
daxil olaraq layihə haqqında ətraflı məlumat əldə etməyi məsləhət görərdim.
Həmçinin www.polychallenge.org səhifəsindən “Polyup” müsabiqələri haqqında ətraflı məlumat almaq
olar.
Əgər siz də dərslərinizi müasir
tələblərə uyğun innovativ və şagirdlərə maraqlı formada qurmaq istəyirsinizsə,
bu ödənişsiz və hər kəs üçün açıq olan platforma çox gözəl imkandır. Platforma
sizə özünüzün və şagirdlərinizin hesablama düşüncəsini inkişaf etdirməyə, sağlam
rəqabət mühitinə qoşulmağa və biliklərinizi artıraraq qalib olmağa kömək
edəcək.