Təhsil Nazirliyinin
sifarişi ilə "Təhsildə İnnovativ
Texnologiyalar" əlavə təhsil mərkəzi tərəfindən 2018-ci ilin dekabr
ayından etibarən respublika üzrə 4 min nəfər müəllim üçün informasiya
texnologiyalarının təhsildə tətbiqi üzrə təlim və stajkeçmə xidmətləri təşkil
olunub. İxtisasartırma xidmətləri bütün respublika üzrə 5 şəhər və 20 rayonda
yerləşən 88 ümumi təhsil müəssisəsini əhatə edib.
Təlimlər İKT üzrə savadlılığın
artırılması, tədris prosesində interaktiv texnologiyalar, elektron məzmun,
layihə metodikası və müasir tədris strategiyalarıdan istifadə istiqamətləri üzrə
keçirilib. Eyni zamanda, təlimlərdə iştirak etmiş şəxslər üçün İKT-nin tədrisdə
tətbiqi üzrə stajkeçmə xidmətləri təşkil olunub.
Təhsil
islahatlarının müvəffəqiyyətlə həyata keçirilməsində pedaqoji kadr hazırlığının
keyfiyyətinin təmin edilməsi başlıca amildir. Müəllim nəzəri baxımdan məlumatlı
olmaqla yanaşı, praktiki bacarığı ilə yeni təlim texnologiyalarından səmərəli
istifadə etməyi bacarmalıdır.
Bu baxımdan, ixtisasartırma
xidmətləri çərçivəsində müəllimlərdə bir sıra 21-ci əsr bacarıqlarının
formalaşdırılmasına diqqət yetirilib. Belə ki, onlara müasir texnologiyaların tədrisdə
rolu, təhsil fəaliyyətində müəllimin sosial ünsiyyət alətlərindən məqsədyönlü
istifadəsi, Azərbaycan Təhsil Şəbəkəsindən istifadə imkanları, tədris üçün
proqram təminatları və müəllimin peşəkar inkişafında professional virtual cəmiyyətlərin
rolu haqqında təlimlər verilib. Eyni zamanda, onlar layihə portfoliosunun
yaradılması, layihənin tədrisində formativ qiymətləndirilməsi, internet vasitəsi
ilə layihə üzərində müştərək işin təşkili, differensiallaşdırılmış tədrisin
planlaşdırılması kimi mövzular üzrə praktiki biliklərə yiyələniblər.
Təcrübə göstərir ki, ixtisasartırma xidmətlərində tədrisdə müasir mexanizmlərdən istifadə üzrə nəzəri və praktiki bacarıqlara yiyələnən müəllimlər dərslərini 21-ci əsrin tələblərinə uyğun və şagirdlərə maraqlı formada qura bilirlər. Bu isə öz növbəsində, tədris prosesini daha zəngin, səmərəli və rəngarəng edir.