Azərbaycan Kibertəhlükəsizlik Təşkilatları Assosiasiyasının təşkilatçılığı, Milli Kibertəhlükəsizlik Mərkəzi və “Caspel” MMC-nin tərəfdaşlığı ilə Naxçıvanda “Konstitusiya və Suverenlik İli” çərçivəsində “Kiber Suverenlik” mövzusunda konfrans keçirilib. Ölkədə bu istiqamətdə təşkil olunan ilk tədbir kimi konfrans kibertəhlükəsizlik sahəsində müzakirələrin genişləndirilməsi baxımından mühüm əhəmiyyət kəsb edir.

Konfransda Elm və Təhsil Nazirliyinin Təhsil Sisteminin İnformasiyalaşdırılması İdarəsinin rəisi Vüsal Xanlarov da iştirak edib. O, çıxışında kibertəhlükəsizlik sahəsində insan kapitalının inkişafı və təhsil-sənaye əməkdaşlığının strateji əhəmiyyəti barədə fikirlərini bölüşüb.

Vüsal Xanlarov qeyd edib ki, hazırda ölkənin 16 ali təhsil müəssisəsində təxminən 2,500 tələbə informasiya təhlükəsizliyi üzrə bakalavr təhsili alır. Bundan əlavə, 1,000-ə yaxın magistrant kibertəhlükəsizlik üzrə ixtisaslaşmış proqramlarda təhsilini davam etdirir. Çıxışda vurğulanıb ki, mentorluq, təcrübə proqramları və real layihələrə inteqrasiya vasitəsilə sənaye nümayəndələrinin təhsil prosesinə erkən mərhələdən cəlb olunması məqsədyönlü kadr hazırlığına və milli kibertəhlükəsizlik sisteminin möhkəmləndirilməsinə xidmət edir.

“Kibertəhlükəsizlik sahəsində təhsil alan gənclərlə sənaye qurumlarının qarşılıqlı əməkdaşlıq modellərini formalaşdırması, əmək bazarının real tələblərinə uyğun praktiki bacarıqların inkişaf etdirilməsi xüsusi önəm daşıyır,” – deyə Vüsal Xanlarov əlavə edib.

Konfrans çərçivəsində keçirilən panel və təqdimatlarda kibersuverenliyin təşviqi, milli rəqəmsal təhlükəsizliyin gücləndirilməsi və bu sahədə institusional əməkdaşlığın əhəmiyyəti geniş müzakirə olunub. Tədbir kibertəhlükəsizlik sahəsində milli strategiyaların təkmilləşdirilməsinə töhfə verən mühüm platforma kimi qiymətləndirilib.