Elm və Təhsil Nazirliyi və Cisco şirkəti arasında əməkdaşlıq çərçivəsində cari tədris ilindən etibarən Qarabağ Universitetində Cisco Şəbəkə Akademiyasının yaradılması nəzərdə tutulub.

Elm və Təhsil Nazirliyi Təhsil Sisteminin İnformasiyalaşdırılması idarəsinin dəstəyi ilə qurulan akademiyanın əsas məqsədi şəbəkə texnologiyaları üzrə yerli mütəxəssislərin hazırlanmasıdır. Cisco Şəbəkə Akademiyasında İT texnologiyalarının əsasları və əməliyyat sistemləri, əşyaların interneti, proqramlaşdırma, şəbəkə texnologiyaları, şəbəkə təhlükəsizliyi və kibertəhlükəsizlik istiqamətləri üzrə təlim kursları keçirilməsi planlaşdırılır.

Akademiyada dərslər "Cisco" şirkətinin beynəlxalq proqramına əsaslanır və peşəkar, sertifikatlaşdırılmış mütəxəssislər tərəfindən keçirilir. Təlim kurslarında iştirak etməklə tələbələr yeni şəbəkələr, şəbəkə inzibatçılığı, təhlükəsizlik və bulud texnologiyaları nəzəriyyələrini öyrənir, praktiki laboratoriyalarda real və virtual sistemlərdən istifadə edərək, biliklərini artırırlar və rəsmi sertifikasiya resurslarına çıxış imkanı qazanırlar.

Keçiriləcək təlimlər sayəsində tələbələr “Cisco sertifikatlı şəbəkə mütəxəssisi“  statuslarını qazanmaq üçün beynəlxalq imtahanlara hazırlaşa biləcək və real tədris laboratoriyası üzərində praktiki biliklər qazanacaqlar.