19-21 sentyabr 2024-cü il tarixlərində Çin Xalq Respublikasının Şanxay şəhərində Huawei Connect 2024 beynəlxalq konfransı keçirilir. Tədbirin keçirilməsində məqsəd müxtəlif sənayelərin rəqəmsal və süni intellekt texnologiyalarından maksimum istifadəsinə dair  rəqabətqabiliyyətli məhsullar və həllər təqdim etmək və geniş çeşiddə süni intellekt modelləri və tətbiqlərini dəstəkləməkdir.

Tədbirdə Elm və Təhsil Nazirliyi nəzdində Təhsil Sisteminin İnformasiyalaşdırılması idarəsinin rəisi Vüsal Xanlarov Huawei şirkətinin qlobal ictimai sektorunun vitse prezidenti Andrew Zhang ilə görüşmüş və bütün təhsil pillələləri üzrə təhsil sisteminin rəqəmsallaşması istiqamətində  müzakirələr aparmışdır. Görüş zamanı eyni zamanda süni intellektin tədrisə səmərəli tətbiqi, rəqəmsal öyrənmə infrastrukturunun təkmilləşməsi mövzuları da yer almışdır.

Qeyd edək ki, 3 günlük tədbirdə rəqəmsal və süni intellekt texnologiyalarının müxtəlif istehsal sahələrində inkişafına dair Huawei-in 20 000-dən çox  həlləri və sənaye trendləri nümayiş etdiriləcəkdir.