"Bakutel”in dəstəyi
və Azərbaycan Qadınları İKT-də - “Femmes Digitales” klubunun təşkilatçılığı ilə sayca 2-ci “AWITA
2018” (“The Women in IT Award”) mükafatlarının təqdimat mərasimi keçirilib. Mükafat
Azərbaycanın informasiya və kommunikasiya texnologiyaları sahəsində çalışan ən
uğurlu qadınlara təqdim edilib.
Təqdimat mərasimi Bakıda
keçirilən Azərbaycan Beynəlxalq Telekommunikasiya, İnnovasiya və Yüksək
Texnologiyalar Sərgisi - “Bakutel-2018” Azərbaycan beynəlxalq sərgi və
konfransı çərçivəsində baş tutub.
“AWITA
2018” mərasimi 500-dən çox peşəkar və qonağı toplayıb. Tədbir zamanı, Təhsil
Nazirliyinə qadınlar arasında İT sahəsinin populyarlaşdırılmasına və təbliğinə
göstərdiyi dəstəyə görə diplom və mükafat təltif olunub.
Bu il
“AWITA” mükafatı müsabiqəsinə 100-dən artıq ərizə daxil olub. Yekun nəticəyə
görə, 11 nominasiya üzrə qaliblər müəyyənləşdirilıb. Müsabiqənin “Rayon və
ucqar bölgədə İT sahəsinə verilən töhfə” nominasiyası üzrə İsmayıllı rayon 1
saylı tam orta məktəbin müəllimi Bahar Abdullayeva, “İlin innovativ müəllimi”
nominasiyası üzrə Sumqayıt şəhəri 1 saylı tam orta məktəbinin
fizika-informatika müəllimi Aliyə Əhmədova
qalib elan olunublar.
Qeyd edək ki, İKT sahəsində Azərbaycan Qadınları – “Femmes Digitales” klubu dövlət və özəl sektorda çalışan qadınları birləşdirmək, həmçinin onların bu sahədə təhsil almaları və karyera yüksəlişinin təmin edilməsi məqsədilə yaradılıb. Bu il klub 4 yaşını qeyd edib.