Təhsil Sisteminin İnformasiyalaşdırılması idarəsinin rəisi Vüsal Xanlarov Çin Xalq Respublikasına səfəri çərçivəsində təhsil müəssisələrində olmuşdur.

Çinin Guangdong əyalətinin Şenzhen şəhərində yerləşən Shenzhen Universitetinə baş çəkən Vüsal Xanlarov təhsil müəssisəsinin tədris və tədqiqat xidmətləri ilə yaxından tanış olmuşdur. Univeristet  regionun qabaqcıl şirkətləri və texnoloji parkları ilə əlaqələri olan praktiki, tədqiqata əsaslanan kompüter elmləri, informasiya texnologiyaları, mühəndislik   kimi sahələri ilə xüsusilə seçilir.

Universitetdə təhsilin rəqəmsallaşması istiqamətində qurum fəaliyyət göstərir. Qurumun fəaliyyət hədəflərinə idarəetmə şəbəkəsinin qurulması və təhlükəsizliyi, proqram təminatının elmi-tədqiqatı, məlumat resurslarının idarə edilməsi, innovativ tədris idarəçiliyi və imkanları  kimi məsələlər daxildir.

Vüsal Xanlarov və universitet rəhbərliyi arasında idarəetmənin rəqəmsallaşması istiqamətində süni intellekt həlləri vasitəsilə   yüksək texnoloji mühitə çıxış mövzusunda fikirlər səsləndirilmiş, müzakirələrdə əsas texnoloji yenilikləri ilə seçilən data əsaslı tətbiqlərin tədris prosesində istifadəsinə dair fikir mübadilələri aparılmışdır.

İdarə rəisi həmçinin 2 nömrəli Shenzhen Eksperimental Məktəbində olmuşdur. Məktəb səfəri zamanı Vüsal Xanlarov təhsil müəssisəsində şagird təhlükəsizliyinin təmin olunması məqsədilə tətbiq olunan üz tanıma həlləri  ilə tanış olmuşdur. Qurulmuş rəqəmsal insfrastruktur arasında təhsilalanların davamiyyətinə nəzarət mexanizminin tənzimlənməsi və tədris prosesindəki müvəffəqiyyətlərinin izlənməsinə yönəlmiş rəqəmsal həlllərin tətbiqi xüsusilə diqqət çəkmişdir.

Qeyd etmək lazımdır ki, tanınmış təhsil müəssisəsinin tədris proqramlarına şagirdlərə müasir elmi sahələri və texnoloji irəliləyişləri araşdırmağa yönəlmiş mühəndislik fənnləri tədris olunur.